Søndag 22.november har 6 lag frå Hafslo delteke i fylkets første Futsal-turnering i regi av fotballkretsen. Futsal foregår innandørs med underlag i form av anten parkett eller sportsgolv, samt futsalball (mindre storleik og redusert sprett) som fører til at spelarane får nye og utviklande ferdigheiter. Storleiken på bana og måla er lik som i handball.
Dagens futsal-turneringar i Sogn har blitt arrangert i Balestrand, Vik og Øvre Årdal, der Hafslo har hatt med lag alle desse stadane.
Hafslo G10 stilte med to lag i Balestrand. Dei to laga spelte 3 kampar på kvar, og det vart to tap og ein siger for begge laga. Men siger i siste kamp for begge G10-laga, sørga for god stemning (som alltid) på heimturen.
Hafslo J13/14 spelte også sine kampar i Balestrand. Jentene spelte 5 kampar der det vart 1 siger, 3 knepne tap og ein uavgjort! Men kjempeinnsats, og ikkje minst live-oppdatering av alle kampane på laget si Facebook-side som alltid! Kjekt for dei som sit heime å kunne følgje med…!
Hafslo G13/14 stilte med 2 lag i 14-års klassa i Vik. Her var det to puljer, der det var lagt opp til sluttspel med semifinalar og finale for laga som vart nr.1 og 2 i puljene. Hafslo G14 1 vann alle sine tre innleiande kampar. Litt tøffare motstand for Hafslo G14 2 som tapte to kampar og spelte ein uavgjort i sine innleiande kampar. Men semifinale for Hafslo G14 1, og her vart det dramatikk. 1-1 mot SIL 1 etter ekstraomgangar, og straffesparkkonkurranse. Hafslo G14 1 vann til slutt 3-2 på straffer og gjekk til finalen. Dessverre vart SIL 2 for sterke i finalen (sjølv om Hafslo hadde slått laget i innleiande). Men uansett kjempeprestasjon av alle G13/14 gutane våre i Vik i dag!
Hafslo G12 spelte sine kampar i Øvre Årdal. Også her viste gutane god innsats i alle sine 4 kampar, sjølv om det vart 3 tap og ein uavgjort. Men uavgjort 2-2 mot Sogndal var utvilsamt ein god og imponerande kamp av gutane!
Ein flott Futsal-søndag i Sogn, der Hafslo IL sine deltakande lag, med spelarar, trenarar og foreldre, har markert seg godt både på og utanfor bana! Og vi gler oss allereie til dei neste to Futsal-turneringane som blir arrangert 20.desember og 9.januar. Sjølvsagt stiller Hafslo IL med lag på begge desse Futsal-turneringane!