Hafslo-jenter har sparka godt frå seg i KM Futsal Innandørs 2017

Etter første dag av KM Futsal Innandørs, er det Hafslo-jentene som har stått for dei største prestasjonane. Hafslo J13 stilte med to lag i Vik. Der gjekk Hafslo J13 1 til finalen, der dei vann 3-0 mot Kaupanger 1! Det betyr KM-sluttspel på Sandane første helga i mars! Vi gratulerer! Video av feiringa finn de på Facebook-sida: Hafslo J13 1 vidare i KM 2017

Det var også ei viss spaning til debuten for samarbeidslaget Hafslo/Bjørn i J15-klassa i Øvre Årdal i kveld. Trenarane Norill Terese og Jarand sa på førehand at jentene var klare, og etter tre suverene kampar i kveld kan vi trygt seie at dei hadde rett. Hafslo/Bjørn J15 spelte tre kampar. Åpna med 4-0 siger mot Lærdal. Deretter 2-0 siger mot Jotun (der keeper Inger Anne redda to straffer!!), og avslutta med 6-0 siger mot Årdalstangen! Tre kampar, tre sigrar og 12-0 i målskilnad! Historisk debut, rett til KM-sluttspelet, og imponerande prestasjon av J15-jentene frå Hafslo og Gaupne! Det blir utruleg spanande å følgje Hafslo/Bjørn J15 vidare!

Hafslo Idrettslag sitt bilde. Hafslo Idrettslag sitt bilde.

Gutane frå Hafslo som var i aksjon i dag, fekk det litt tyngre. Hafslo G15 spelte tre innleiande kampar i Øvre Årdal, der det dessverre vart tre tap. Gutane var på høgde med motstandarane, men fekk dårleg uttelling på sjansane! Dei ga alt i dag, men dessverre kom dei seg ikkje vidare! Men humøret likevel på topp!

Ove Midtbø sitt bilde.

Hafslo G13 fekk det også tøft i Vik. Tre kampar og tre tap vart fasiten til slutt. Men ettersom dei fleste på laget var G12-spelarar, tek dei dette med seg som erfaring til neste års KM! Og rapportane seier at gutane ga alt i Vik og hadde det kjekt! Det er trass alt det viktigaste!

I morgon (søndag 5.februar) skal fleire lag i aksjon. Hafslo J14, Hafslo G14 og Hafslo/Bjørn J16 skal spele innleiande kampar i Øvre Årdal. Hafslo G16 skal prøve å kvalifisere seg til sluttspelet i morgon ettermiddag/kveld i Vik!

Ein fantastisk fotball-laurdag er overstått, og vi håpar på ein minst like flott fotballsøndag i morgon!

HEIA HAFSLO (og Hafslo/Bjørn J15/16/17)!

Hugs at du kan følgje KM-kampar direkte frå Øvre Årdal via Porten.no

Resultatservice frå alle KM-kampane finn du på kretsen sine sider her: Resultatservice KM Futsal Innandørs 2017